ابن حلال مصطفي

كتب يوسف معاطي

ابن حلال مصطفى

حينما يكون المكان‏..‏ مقهي‏..‏ أو جلسة ودية‏..‏ لابد أن يتكلم الجالسون‏..‏ وإذا لم تكن موجودا فلا أروع ولا أحلي من الكلام عن هذا الغائب الذي هو أنت‏,‏ إن الكلام عن الغائبين شيء ممتع حقا‏..‏ والكلام الذي ستقرأونه حضراتكم الآن‏..‏ هو ما قاله صديق لصديق آخر عني‏..‏ وحتي لا يصبح مقالي شخصيا أو نرجسيا‏..‏ فتأكدوا أن هذا ما يقال عن حضراتكم في غيابكم‏..‏ وهذا أيضا ما تقولونه حضراتكم في غياب الأصدقاء الآخرين‏..‏قال‏..‏ الحقيقة هو إنسان كويس‏..‏ دي لا يمكن حد يشكك فيها‏..‏ يمكن يكون أناني شويه‏..‏ مش كده‏!!‏ اوعي تفتكر إني ضده ولا فيه حاجة بيني وبينه‏..‏ وحياة ولادي أبدا‏..‏ ده راجل خيره لغيره‏..‏ وأفضاله علي الناس كلها‏..‏ أنا بس اللي بيضايقني منه‏..‏ إنه يبان لك طيب وفي الوقت نفسه ده‏..‏ ده‏..‏ مصيبة‏..‏ يعرف من أين تؤكل الكتف مضبوط‏..‏ بس هو مش وحش‏..‏ ليه‏..‏ بص علي كتاباته‏..‏ بصراحة كتاباته ما تخرش الميه‏..‏ لما بيكتب بصراحة بيكتب كويس‏..‏ إنما يا أخي‏..‏ كل اللي بيكتبه ما لوش أي قيمة‏..‏ تحس إنه نصب عليك‏..‏ شوف بقاله بيكتب قد إيه‏..‏ ماكتبش حاجة عليها القيمة لحد دلوقت‏..‏ الغريبة بأه‏..‏ إنه بيعتقد في نفسه إنه بيعرف يكتب‏..‏ انت قريت له‏..‏ مش كده‏..‏ مش حسيت إن كل اللي بيكتبه تفاهات‏!!‏ أنا مش عاوزك تفهمني غلط‏..‏ أنا بحبه قوي لعلمك وهو بني آدم كويس‏..‏ كفاية شهامته‏..‏ مش كده‏..‏ راجل عشرة علي عشرة‏..‏ بشرط واحد‏..‏ إنك ما تقربش ناحية جيبه‏..‏ هزر معاه‏..‏ واضحك ونكت للصبح‏..‏ إنما تيجي في الفلوس تشوف بني آدم تاني‏..‏ هو بني آدم مش وحش علي فكرة‏..‏ إنما لو استلف منك فلوس‏..‏ قول عليها يا رحمن يا رحيم‏..‏ ما بيرجعش حاجة ولو عزمك علي ساندوتش فول‏..‏ يخلي مصر كلها تعرف إنه عزمك إنما والله العظيم أنا بحبه‏..‏ وأنا بقول ده عشان بحبه‏..‏أنا لو ليا أخ ما أحبوش زي ما بحبه‏..‏ إنما هو بس لو يبطل السواد اللي جواه ده‏..‏ مش أخذت بالك برضه من الحكاية دي‏..‏ حقودي بشكل‏..‏ أعوذ بالله‏..‏ إنما هو عنده ميزة‏..‏ محدش يقدر ينكرها‏..‏ إنه اللي في قلبه علي لسانه‏..‏ دي حقيقة‏..‏ صحيح هو منافق من الدرجة الأولي إنما والله العظيم أنا بحبه‏..‏ لأن البني آدم الكويس الناس كلها بتحبه‏..‏ كفاية إنه عمره ما اتكلم علي حد من ورا ضهره‏..‏ كفاية دي‏..‏ هوه طبعا ساعات ينم علي الدنيا كلها‏..‏ إنما يكفي إنه بيفكر في مصلحة الغير قبل مصلحته‏..‏ مفيش حد النهارده بيعمل كده‏..‏ إنما برضه عشان نقول اللي لينا واللي علينا هو من ناحية إنه انتهازي‏..‏ انتهازي‏..‏ ما يعرفش أبوه‏..‏ والله أنا ما باشتمه حاشا لله‏..‏ ده حبيبي وانت عارف‏..‏ كفاية بشاشة وشه وابتسامته بالدنيا كلها‏..‏ هو صحيح قدمه مش حلو قوي‏..‏ إنما‏...‏كانت تلك هي اللحظة التي دخلت فيها عليهما‏..‏ فهتف بي صديقي الذي يحبني‏..‏ وقال‏..‏ ابن حلال مصفي‏..‏ بقالنا ساعة مالناش كلام غير عنك‏..‏ ياريتنا افتكرنا مليون جنيه‏..‏ مالك قالب وشك وضارب بوز ليه‏..‏قلت لهما‏..‏ البقية في حياتكوا‏..‏ محمود فتحي تعيشوا انتوا‏..‏قالا‏..‏ في صوت واحد‏..‏ لا حول ولا قوة إلا بالله‏..‏قلت لهما‏..‏ كان جدع طيب قوي‏..‏ أنا كنت بحبه‏..‏أومئا برأسيهما وقد دخلا في مود الحزن بسرعة فائقة‏..‏ثم أردفت‏..‏ هو صحيح كان يموت علي القرش‏..‏ إنما كان راجل محترم‏..‏ قالا‏..‏ أيوه‏..‏ أيوه‏..‏ الله يرحمه‏..‏ثم قال أحدهما‏..‏ الله يرحمه كان صاحبي الروح بالروح‏..‏ أكثر من أخ‏..‏ هوه صحيح كان كداب شويه‏..‏ إنما هو دلوقت بين إيدين المولي عز وجل‏..‏ كفاية إنه كان راجل‏..‏ راجل بمعني الكلمة‏..‏ ثم همس لنا‏..‏ بس انتوا عارفين مراته خلعته ليه‏!!!

وماذا فعلنا بها؟

كتب يوسف معاطي

وماذا فعلنا بها ؟

من أسخف الأشياء التي أواجهها في حياتي .. تلك الطريقة في الكلام التي يتبعها بعض الناس .. فهذا مثلاً
يقول لي .. امبارح كنت عند أختي .. ثمّ يسألني هو دون أيّ مناسبة : كنت عند مين ؟ فأضطر متثاقلاً أن أردّ..
عند أختك .. يقول كويّس .. لقيتها كده مش في حالة مظبوطة .. مش في حالة إيه ؟! ويجب طبعاً أن أردّ قائلاً :
مظبوطة .. ثمّ يقول : بس قلت .. باين جوزها اتخانق معاها .. جوزها اتخانق إيه ؟! أقول : معاها ..
ولكم أن تتصوّروا هذا القلق الذي يفرضه عليّا محدّثي .. بأن أردّد وراءه كلّ ما يريد .. وبما أنّنا نعيش أيّام
الإصلاح والديموقراطيّة فإنّي أهدّد كلّ من تسوّل له نفسه ويحادثني بهذه الطريقه .. أن أبلّغ عنه وأتّهمه بأنّه
كان أحد الإرهابيّين الذين قاموا بعمليّة 11 سبتمبر .. إيه ؟! سبتمبر.
ولأنّنا نعيش أيّام الإصلاح .. وكلّنا شعوباً وحكّاماً لا حديث ولا عمل لنا سوى الإصلاح .. فاسمحوا لي أن
أذكّركم بأنّ الإصلاح لا يبدأ فعليّاً إلاّ بالمكاشفة .. لنواجه أنفسنا بكلّ صراحة .. ولنعترف أنّنا ـ كمواطنين
عرب ـ تنقصنا دقّة الملاحظة .. دقّة إيه ؟! الملاحظة .. والذي أكّد لي هذا أنّ الوزراء والحكّام العرب ريقهم
نشف وهم يقسمون بأنّ مسيرة الإصلاح هذه ليست وليدة اليوم ، بينما هي بدأت بالفعل منذ سنوات عديدة ..
لم يصدّق أحد ذلك .. وكرّروا لنا كثيراً أنّه لا توجد أدنى علاقة أو ربط بين بين المشروع الأمريكي بالإصلاح
وبين الإصلاح الذي وُضعت أساساته عندنا في المنطقة منذ زمن بعيد ولم يشغر أحد .. ولم يلاحظ ذلك ..
يعني العمارة موجودة بأساساتها .. والبناء شامخ أمامكم ولكن لا يزال على الطوب الأحمر .. يتبقّى فقط
الدهان والشبابيك والأبواب ولكن هل تستطيع أن تنكر أنّك ترى أمامك عمارة .. أمامك إيه ؟! ما تردّ ؟!
عمارة ..
لا يا سيدي .. عندنا ديموقيراطيّة وعندنا حرّية وعلى أعلى مستوى وإذا كنّا أخذنا الأمريكان على قدّ عقلهم
وقولنا ـ قلنا ـ حاضر .. سنسير في الإصلاح فليس معنى هذا أنّنا لا سمح الله لا تتوافر لدينا الديموقراطيّة ..
وإنّما .. خلّيك معايا .. معاك عربيّة .. وماشي بيها على الطريق .. سقفت منّك وقت بأصلها .. وقفت انت
ماذا تريد ؟! تريد إصلاح العربيّة طبعاً .. إنّما في الأساس .. فيه إيه ؟! ما تردّ ؟! عربيّة .. كويس .. بدأت
تفهمني ..المشكلة إنّنا .. زمان ـ حينما حينما وزّعنا الديموقراطيّة على المواطن العربي .. كان لا يزال
حديث العهد بها ..كلّ مواطن استلم ديموقراطيّته ووضعها في جيبه ومشى .. لا يعرف ما هذا .. ولا يعرف
كيف يتصرّف بها .. وهذه غلطتنا .. كان يجب قبل أن نوزّعها على المواطنين أن نعرّفهم بها أوّلاً .. للأسف
لم نلتفت لذلك وقتها .. وكانت مهزلة حقيقيّة .. حاجة تكسف صحيح .. بعضهم أخذها وأخذ يقلّب فيها بين يديه
وقال لزميله ودي نعمل بيها إيه .. تصوّر !! معه ديموقراطيّة ولا يدري ماذا يفعل بها .. والبعض الآخر
استخدمها ليسند بيها رجل ترابيزة .. وأحدهم أكلها !! تصوّر !! أكل الديموقراطيّة !!
هؤلاء الناس لو تركت لهم الرصيف دون حراسة لأكلوه .. وآخر أخذ يلوكها في فمه .. يظنّها لبانة ..أنت تعرف
طبعاً أنّ الديموقراطيّة مطّاطة بعض الشيء .. وكعادتنا نحن الشرقيّين شعوب استهلاكيّة .. و( يقسم ) يا أخي
ديموقراطيّة سنة خلّصوا عليها في شهر !! والآن حينما سمعتم أمريكا تنادي بتوفير الديموقراطيّة للشعوب ..
مشيتم مع الهوجة .. وقلتم آه .. فعلاً .. ما عندناش .. ما شفنهاش ..
آه يا ناكري المعروف .. لم تروا الديموقراطيّة يا ( .... ) ؟! لم تمارسوها يا ظلمة .. وهذه الأطباق التي تعلو
البيوت والأفلام التي تنزل بالكامل مش مقطوع منها منظر من يشاهدها ؟! وروبي ونانسي عجرم وإليسا
وهيفاء وهبي .. ماذا يفعلن أكثر من ذلك !! والقنوات التي تصوّر الحياة اليوميّة لشباب قاعدين على راحتهم
أمامك أربعاً وعشرين ساعة .. هم يتصرّفون بحريّة وأنت تشاهدهم بحريّة .. ماذا تريد أكثر من ذلك .. فعلاً
نحن شعوب تخاف ما تختشيش .. إذا قالوا فيه زيت في الجمعيّة تلاقي أمم واقفة وكلّه بيقول أنا ما خدتش ..
حتّى عبد الحليم .. يغنّي يا مفرّقين الشموع .. قلبي نصيبه فين ؟!
هكذا بعد عشرات السنين .. وحكّامكم يزرعون لكم الديموقراطيّة وأنتم تنزلوز عليها كالجراد حتّى تأتوا عليها
تماماً .. ثمّ بعد ذلك تنكرون .. عموماً أنتم لا ينفع معكم الإيد السايبة .. بطاقات التموين عادت مرّة أخرى
وستنزل الديموقراطيّة على البطاقة .. وأحذّركم من الآن أن تبيعوا الديموقراطيّة المدعومة في السوق
السودا .. مفهوم !! في السوق إيه ؟!!

عنده متينيج .. !

كتب يوسف معاطي

عنده متينيج .. !

كان متوتّراً للغاية .. متعجّلاً للغاية .. يربط الكرافاتة وهو في الطريق ..
ويشدّ سوستة البنطلون التي نسيها من فرط عجلته .. ويركض ركضا .. كان
يردّ سلامات الآخرين بسرعة واقتضاب .. أهلا .. معلش .. أصلي مستعجل
قوي أهلا .. أنا آسف جدّا .. عندي ميتينج !!
استوقفته سيّدة غلبانة في الكوريدور وقالت في أسى : يا بيه ربّنا
يباركلك .. بقالي ست شهور رايحة جايّة ومش عاوزين يقبّضوني المعاش .. قال
لها بسرعة وهو يركضحاضر .. حاضر يا ستّي .. تعاليلي يوم السبت ..
حاضر .. عنيّا .. ( كان حينما قال لها عنيّا قد ابتعد عنها 20 مترا على الأقلّ )
في نفس اللحظة التي اقترب منه عمّ بشيوني العامل القديم بالمصلحة وهتف
به : عملتلنا إيه يا بيه في الحوافز ؟!
قال صاحبنا بسرعة .. يوم السبت يا عمّ بسيوني .. ابأه كلّمني
في الموضوع ده يوم السبت .. مش فاضي .. سيبوني بأه يا جماعة..
( كان حينما قال يا جماعة قد صعد إلى الدور الثاني وعمّ بسيوني لا يزال في الدور
الأسفل ) .
قال للسكرتير الذي انتفض حينما رآه .. الباسبور ..
ادّيني الباسبور .. بسرعة .. أنا طالع المطار دلوقت .. عندي ميتينج !!
تلقّف الباسبور بسرعة وخرج كغزال يثب بسرعة والسكرتير يلاحقه ..
فيه شكاوى كثير قوي من المواطنين والموضوع وصل لمجلس الشعب ..
قال صاحبنا الذي لم يطق صبراً على انتظار الأسانسير ونزل السلّم على
رجليه .. يوم السبت أجّل كلّ حاجة ليوم السبت انت مش شايفني .. مستعجل
فيه ميعاد طيّارة .. وقبل أن يدخل سيّارته جرى السائق ليفتح له الباب
فصرخ فيه .. اطلع ياسطى عبده .. دور .. ياللا .. مفيش وقت وفجأة وجد
يداً تسقط على كتفه في ودّ ..
على فين يا باشا .. إنّه حلمي .. صديقه القديم .. مين ؟ حلمي !! لمؤاخذة يا حلمي
أصلي .. ولكن حلمي قاطعه قائلاً .. شفت وكستنا مع الجزائر .. في كأس الأمم
الأفريقيّة .. عاجبك اللي حصل ده ؟! هنا نسي صاحبنا كلّ شيء .. نسي الطيّارة
والموعد والميتينج وقال لحلمي بعصبيّة همّا بيعملوا فينا كده ليه يا حلمي ـ ينزل
هادي خشبة ازّاي فهمّهاني !! هو بيهاجم ولاّ بيدافع .. يا عمّ دول كانوا بيلعبوا عشرة
ـ عشرة !! همّا غاويين يحرقوا دمّنا .. أنا ضغطي علي با حلمي ـ يقسم ـ قايس الضغط
بعدها لقيته 180 / 90 .. طيب حازم ما نزلش ليه ؟ قوللي انت يا حلمي .. ده أنا من
قبلها بيوم قاعد ومستنّي وادّيت الموظّفين أجازة وعاوزين نفرح يا حلمي .. وكلّ ما
يجيبوا الكاميرا على محسن صالح أقول له فكّها يا محسن .. من أولّ الماتش وهو
ضارب حتّة بوز .. كأنّه شايف الماتش قبل كده .. غاويين عياط احنا .. وميلودراما
تحسّ انّك مبتشوفش ماتش .. بتشوف مسلسل حديث الصباح والمساء ـ واللاعب من
عندنا لو اتضرب ووقع .. يا ساتر يا ربّ !! كأنّ حدّ ضربه بخنجر في بطنه يقع على
الأرض ويتلوى ويبصّ للحكم والدموع في عينه تقطّع القلب... شايف يا كابتن
بيضربونا ازّاي !! ده ظلم .. دي مش كورة حرام عليكو يا ظلمة !! ولو لاعب من
عندنا بأه ضرب لاعب من عندهم يخبطه الشلّوت المحترم من دول ويرزعه المقصّ
ويوقعه على الأرض ويقوم رافع إيديه وباصص للحكم بكلّ براءة وكأنّه معملش حاجة ..
أهو .. أنا ملمستوش يا كابتن هو اللي وقع لوحده ولو الحكم انطسّ في نظره وحسب
فاول علينا ولاّ حاجة .. يا ساتر يا ربّ .. تلاقي اللاعب بتاعنا وهو بيخبط في الأرض
برجليه وبيرفع إيديه وبيدعي على الحكم ..
كلّهم عندهم عقدة الاضطهاد .. أنا خلاص يا حلمي حلفت ميت يمين ما أشوف كورة
تاني ـ وعلى إيه مش ناقصة أمراض .. ده أنا كان بُقّي ح يتعوج في الماتش الأخراني ،
المدرّب بيعيّط واللعيّبة بتعيّط .. واحنا بنصوّت هنا .. ولازمته إيه ده كلّه ؟!
والله اللي يشوف كورة بعد كده يستاهل اللي يحصل له .
وظلّ صاحبنا هكذا يتكلّم بحماس وانفعال لأكثر من ساعة كاملة .. ثمّ سأل حلمي .. وانت
على فين دلوقت يا حلمي معلش أصل أنا مستعجل ورايا طيارة عندي ميتينج !! فأجابه
حلمي .. رايح القهوة أشوف ماتش مصر والكاميرون .. هنا صرخ صاحبنا هو النهاردة
التلات ؟! أنا فاكره الاتنين !! وح يلعبوا الساعة كام .. نظر حلمي في ساعته وقال ـ كمان
ربع ساعة فصرخ صاحبنا وقال لسكرتيره .. الغي الطيارة .. أجلّ السفر ليوم السبت ..
أجلّ مواعيدي كلّها لو حدّ سأل عليّا قول له .. عنده ميتينج .. وتأبّط ذراع حلمي وقال له
.. يا ربّ بأه يفرجها النهاردة .. ألا يا حلمي بيقولوا إنّ كعبنا عالي على الكاميرون ..
صحيح يا حلمي !!!

الطريق الى البنك

كتب يوسف معاطي

الطريق الى البنك

كان لسابع مرة يصف لي عنوان البنك بدقة شديدة وبتفاصيل دقيقة للغاية ولم أكن قد ارتكبت جرما حتي يفعل بي كل هذا سوي انني ألقيت سؤالا عابرا علي الجالسين‏..‏ ولم أخصه هو بالسؤال‏..‏ هو البنك الفلاني له فرع بالمهندسين؟‏!‏

وبعيد عن السامعين اتفتح صديقي في وصف عنوان البنك‏..‏ بادئا اجابته بسؤال‏..‏ فين جامع مصطفي محمود ؟‏!‏ أكيد عارفه طبعا‏..‏ هوه اصل له اربع نواصي‏..‏ ناصية علي شارع جامعة الدول العربية وناصية من ناحية المدرسة والناصية الثالثة بتاعة الصيدلية‏..‏ وضهر الجامع عند الفكهاني‏..‏ بعد الصيدلية بأه فيه كوفي شوب‏..‏ باقعد فيه علطول‏..‏ عارف مين بيقعد فيه كمان‏..‏ فهمي سليمان‏..‏ فهمي سليمان يا جدع اللي كان معانا في المدرسة عارف ده اتجوز مين ؟‏!‏ بنت بيومي عطا‏..‏ بيومي عطا يا جدع بتاع المقاولات‏..‏ اللي تلاقي اعلاناته علي المحور‏..‏ أيوااه‏..‏ قبل منزل المريوطية وانت رايح علي كرداسة‏..‏ شفت المنطقة هناك ولعت ازاي؟‏!‏ كانت بتراب الفلوس دلوقت المتر فيها بأه بالشئ الفلاني‏..‏ وحمدت الله علي ان الحوار اوصلنا الي كرداسة وانتهي موضوع البنك ولكنه عاد وتذكر انني كنت أتساءل عن عنوان البنك‏,,‏ وقال البنك‏,,‏ بأه ح تسيب البقال اللي علي الناصية واول ناصية بعد البقال ح تلاقي بتاع فضة‏..‏ عارفه‏!!‏

صرخت في غيظ‏..‏ خلاص عارفه واللهي‏..‏ قال صديقي‏..‏ عنده تشكيلة حلوة قوي علي فكرة ح ابأه اخدك مرة ونروح له‏..‏ اصله بيعمل لي خصم جامد قوي‏..‏ ح نروح ناخذ اللي عاوزينه ونمشي‏..‏ بص ومدلي اصبعه وقال الخاتم ده من عنده شايف الشغل اللي فيه‏..‏ واخذنا صديقي في رحلة عن عالم الفضة وانواعها حتي مات موضوع البنك تماما‏..‏ وكنت قد اقسمت فيما بيني وبين نفسي الا اسأل عن اي شيء في وجوده مرة اخري‏..‏ ولكنه وبمهارة شديدة بعد ان انهي المرحلة الفضية من حديثه قال‏.‏ قلت لي يا سيدي بأه عنوان البنك‏..‏ ده سهل خالص انت عديت محل الفضة وماشي‏..‏ خش اول يمين وادي ضهرك للجامع وبص قدامك ح تلاقي ايه‏..‏ قلت له وان اتنفس الصعداء اخيرا البنك‏..‏ قال‏..‏ لأ المدرسة انت موش مركز معايا علي فكرة‏..‏ مش قولنا فيه مدرسة علي الناصية ؟‏!‏ انت ايه يا عم‏!!‏ ما تصحي معايا‏!!‏ ح تلاقي المدرسة بتاعة اللغات‏..‏ وحتي ح تلاقي العيال عاملين هيصة جوه المدرسة‏..‏ ونازلين جري ولعب وزعيق‏..‏ جيل آخر زمن بأه‏..‏ ده احنا ما كناش نقدر نفتح بقنا في المدرسة‏...‏ فاكر يا جو‏..‏ لما مدرس العربي ظبطك بتتكلم مع اللي جنبك ومدك علي رجيلك‏..‏ يا ااه‏..‏ كانت ايام يا أخي‏..‏ كنا بنترعب من المدرسين دلوقت العيال لا هاممهم مدرسين ولا اولياء امور‏..‏ ما هو التعليم عمره ما حينصلح حاله إلا لو رجعت هيبة المدرس تاني‏.

‏ وأخذنا صديقي هذه المرة في رحلة كلامية عن التعليم وما صار اليه وما كان عليه‏..‏ هنا لم اطق صبرا وانفجرت فيه‏..‏ فين البنك فين البنك يا جبار يا مفتري‏..‏ حرام عليك دوختني معاك‏..‏ قال مندهشا ما انا بقولك‏..‏ قلت له بتقول ايه يا أخي‏.‏ انا باسألك ع البنك مالي انا بالمدرسة‏..‏ سيب المدرسة‏.‏ قال مستغربا‏..‏ ما سيبت المدرسة من الصبح‏..‏ انت اللي واقف عندها معرفش ليه انت مالك‏..‏ بتزهق علطول كده ليه ده احنا ما صدقنا وصلنا‏..‏ بعد المدرسة بناصيتين ح تلاقيه في وشك قلت له البنك ؟‏!‏ قال لأ‏..‏ الفكهاني‏..‏ صرخت فيه وانا اكاد اجن‏..‏ وانا مالي بالفكهاني؟‏*!‏ مالي بالفكهاني‏..‏ قال راجل بقاله تلاتين سنة في المنطقة وعارف كل شبر فيها‏..‏ تروح تسأله علي البنك ح يقولك اهوه‏..‏ امسكته من زوره وسألته في غيظ مكتوم بقي انت مش عارف عنوان البنك ؟‏!‏ قال وهو يخلص نفسه بصعوبة من قبضة يدي‏..‏ يا سيدي عارفه‏..‏ بس انا بحاول اختصر المشوار‏..‏ وبعدين اصل هناك مفيش ركنه انا عاوزك تركن عند الفكهاني وتمشي الكام متر دول لغاية البنك‏..‏ فهمت‏!!‏ وذهبت في اليوم التالي حسب خريطة صديقي‏.‏ وانا استرجع ما قاله عن فهمي سليمان وبيومي عطا وكرداسة‏..‏ والكوفي شوب والمدرسة ومحل الفضة حتي وصلت للفكهاني وسألته البنك فين واللهي‏..‏ اجاب الفكهاني‏..‏ بنك ايه ؟‏!‏ ما اتنقل يا باشا‏..‏ الفرع كله راح ميدان لبنان‏!!‏ هنا قررت ان اتصل بصديقي واقول له كلمة ابيحة في التليفون‏..‏ وإذا به هو الذي يطلبني من نفسه‏..‏ هه‏..‏ عملت ايه‏..‏ الوصفة ما تتوهش طبعا‏..‏ الفرع اتنقل ميدان لبنان؟‏!‏ بس‏..‏ بس‏..‏ بس عارفه‏..‏ انما اقول لك تروح ازاي‏..‏ ح تنزل الميدان‏..‏ فيه واحد بتاع حمام مشهور في الميدان في شارع النيل الابيض‏..‏ أيواااه هو ده‏..‏ انا من كام يوم كنت بآكل عنده‏..‏ بيعمل شوية حمام محشي‏..‏ حكاية تعرف قابلت مين بياكل عنده‏..‏ سارة‏..‏ بنت منتصر مع جوزها‏..‏ ما شاء الله البنت كبرت قوي‏..‏ شوف دي كانت قد إيه‏..‏ العيال كبرونا يا جو واللهي‏..‏ والواد شريف جوزها واد ابن حلال قوي‏..‏ تصور كان عاوز يحاسب لي علي الطلبات‏..‏ عامل فيها راجل قلت له يا واد ده أنا عمك عيب المهم خليته يحاسب في الآخر عشــان ما ازعلوش‏.................

وضاع العمر يا وطني

كتب يوسف معاطي

وضاع العمر يا وطني

فعلا‏..‏ لقد تحولنا جميعا إلي كائنات ريموتية‏..‏ حيث ينجعص كل منا علي كنبة ممسكا بالريموت كونترول‏..‏ ويظل يغير في القنوات دون أي تركيز علي شيء معين وكأننا نبحث عن شيء لا نعرفه أصلا أو ليس له وجود‏..‏

تتلاحق الصور والعبارات مع كل ضغطه علي الريموت‏..‏ ولأصحبك معي يا عزيزي في رحلتي الفضائية بين المحطات‏..‏ فهذا شيخ يبكي من فرط الخشوع والإيمان‏,‏ وهذه مذيعة في الجزيرة تلقي ببالغ الأسي خبرا عن انفجارات في بغداد والجزائر وهذا سعد الصغير يغني البلح‏..‏ البلح ودينا ترقص بجواره‏..‏ وهذا هدف يحرزه رونالدينهو ويجري مبتسما وهذه فتاة واقعة تتمايل وهي تسأل المشاهدين اسئلة في غاية التفاهه والتليفونات تنهال عليها‏..‏ وضاع العمر يا وطني‏..‏ ساعات طويلة يلتهمها الإعلام من عمر الوطن وزكي رستم في فيلم نهر الحب يقول لفاتن حمامة ـ قال أيه ـ دقيقة تفرق في حياة شعوب يا آمال‏!!!‏

كل هذا وشعب الصين الشقيق نازل حرت شغال ليل نهار مابيونش ياليتنا نملك ريموتا نتحكم به في مشاهد حياتنات‏..‏ عموما‏.‏

لا تحمل هما‏..‏ كل مشكلة مهما كانت مستعصية‏..‏ لها حل‏..‏ فقط أجلس أمام التليفزيون والريموت في يدك‏..‏ وكل الأمور مقضية بعون الله‏..‏ والحلول كلها دليفري‏..‏ تأتي لك حتي باب بيتك ويضاف عليها فقط سعر الشحن‏..‏ أنت مثلا تعاني من مرض السكر ودايخ السبع دوخات بين الأطباء والمستشفيات‏..‏ وعلي أيه ده كله‏!!‏ كل أدوية السكر والأنسولين هي من صناعة الغرب الكافر المنحل‏..‏ والله يا أخي لو الشفا ييجي علي أيديهم يغور من وشهم‏..‏ عسل السدر الجبلي خلص مع الموضوع‏..‏ يتساءل أحدهم وكيف نعرف عسل السدر يرد الخبراء عسل السدر ح تلقاه لون شجر السدر وبالظبط‏..‏ يتساءل آخر وما هو لون شجر السدر فيرد الخبير‏..‏ ح تلقاه لون عسل السدر بالظبط‏..‏ ويطلع أحدهم في نهاية الإعلان ليحكي عن تجربته مع عسل السدر‏..‏ ويقول أنا كنت بأحس بدوخة وأطرافي منملة علطول‏..‏ لغاية ما ابتديت آخد عسل السدر‏..‏ دلوقت بآكل كل حاجة‏..‏ هذا بالنسبة للسكر‏..‏ أما بالنسبة للضغط الذي استفحل وأنتشر هذه الأيام‏..‏ تعلاجه من أبسط ما يكون‏..‏ عليك وعلي الشيخ جمال بتاع أمبابه والشيخ جمال يمسك مريض الضغط من قناة مسكه ما يمسكهاش مخبر‏..‏

حتي ينزل الدم الفاسد الأسود وهي طريقة معروفة اسمها الحجامة‏..‏ تفوق بعدها علطول‏..‏ ولا صداع بأه ولا وجع دماغ تاني‏..‏ ظبطنا السكر والضغط‏..‏ نخش علي المفيد بأه‏..‏ أنا عارف أنت أيه اللي تاعبك‏..‏ إنما بعون الله سهلة‏..‏ عليك وع الشيخ العطار‏..‏ عامل خلطة أعشاب تقوم قطر‏..‏ تخليك لا مؤخذة واحد تاني شكلا وموضوعا‏..‏ نيجي بأ لحكاية الرزق‏,‏ اطلع ع الشيخ ابراهيم ابو العيون ودا استاذ السحر بالقرآن بس ياريت تروح له من طرف حد من حبايبه عشان ده الطوابير عليه بالكوم‏..‏ جلستين معاه‏..‏ وع الخير اللي ح ينزل عليك زي المطر‏..‏ خلاص يا عم‏..‏ فيه أي مشاكل‏..‏ روح نام بأه وأشبع نوم‏..‏ شفت أيه في المنام؟‏!‏ حلمت أنك قال راكب مركب في عرض البحر‏..‏ والموج عالي وراح جاي طير كبير ماتعرفش ده نسر ولا رخ‏..‏ وراح وأخدك من وسطك‏..‏ وطاير بيك لحد ما وصلت البر وراح عامل لاند ينج ونزلت بالسلامة‏..‏ وروحت قايم من النوم‏..‏ تعمل أيه‏!!‏ تطلب الشيخ سيد حمدي علطول‏..‏ أصل الأحلام دي مش عاوزه اللي يهملها‏..‏ أحسن تتطور بعد كده‏..‏ لازم تلحقها من الأول‏..‏ وهكذا يا عزيزي‏..‏ هل تري أي مشكلة أمامك؟‏!‏ ألم أقل لك أنها سهلة‏..‏ سهلة خالص‏..‏ ماذا يتبقي؟‏!‏

آه‏..‏ أنت خايف من بكره‏..‏ اطمأننت علي الحاضر‏..‏ ولكن ماذا عن المستقبل؟ اطلب الألوسي الفلكي ح يقولك علي كل حاجة وح يطمنك والشيخ علي خليفة يعمل لك حجاب يخليك تفوت في الحديد‏..‏ وقد اتصل أحد المشاهدين ذات مرة بالبرنامج‏..‏ الحقني يا سيدنا الشيخ‏..‏ الحقني فجأة دلوقت وأنا بأتفرج علي البرنامج الدنيا ضلمت في عيني وأنا مش شايف مش شايف‏..‏ أرتبك الشيخ والمذيعة التي بجواره‏..‏ سأله الشيخ دي أول مرة تحس بفقدان البصر أجاب الرجل مذعورا‏..‏ أيوه يامولانا‏..‏ قال الشيخ ده عمل معمول لك يا أخي‏..‏ خد حجاب الشفاء من العمي أهوه قدامك علي الشاشة‏..‏ قال الرجل‏..‏ بقولك مش شايف يا عم الشيخ شاشة أيه‏!!‏ قال الشيخ‏..‏ إذا قول ورايا‏..‏ وبدأ مولانا في تلاوة تعويذه الشفاء من العمي‏..‏ وسبحان الله بقدرة قادر صرخ المشاهد فرحا‏..‏ هييه‏..‏ هييه أنا شايف‏..‏ النور جه‏..‏ قال الشيخ‏..‏ نور أيه‏!!‏ قال المشاهد‏..‏ أصلهم كل يوم يقطعوا الكهرباء في الوقت ده ماتجيش الا تاني يوم الصبح‏..‏ ربنا يباركلك يامولانا‏..

فوزي‏..‏ بتاع زمااان

كتب : يوسف معاطي

فوزي‏..‏ بتاع زمااان

هذه رسالة من صديق‏..‏ انقلها لحضراتكم كما أتت لي دون تغيير أو تعديل‏,‏ يقول فيها‏:‏ الكاتب الجميل الذي أشعر كلما قرأت اسمك علي صفحات الجرائد أو علي أفيشات الأفلام بسعادة غامرة لا أستطيع أن أصفها لك‏..‏ وسعادتي للحق ليست نابعة من متابعتي لكتاباتك أو أعمالك الفنية‏..‏ وانما لمتابعتي فقط لانتشار اسمك وكبر حجمه وبنطه طوال السنوات الماضية ـ دول حتي ساعات بينشرولك صورة كمان جنب المقال‏..‏ ولا تؤاخذني علي عدم قراءة مقالاتك أو مشاهدة أعمالك‏..‏

إنما أنا أسمع انها حلوة‏..‏ فتقبل عذري فلا وقت عندي لأي نوع من أنواع الترفيه‏,‏ فدوامة أكل العيش تجعلنا ندور ونلف حول أنفسنا‏..‏ انت طبعا لم تتذكرني بعد ولك كل العذر كان الله في عونك‏..‏ أنا يابوحجاج أبأه فوزي‏!!!‏ فوزي بتاع زمان‏..‏ زميل التختة في مدرسة أم المؤمنين الابتدائية المشتركة‏..‏ أوعي تقول انك مش فاكرني‏..‏ أحسن أزعل‏!!‏ مش عارف ليه كل اللي بيوصلوا ويتشهروا يابوحجاج بينسوا أصحاب زمان‏..‏ بأه تنسي فوزي‏!!!‏ ده احنا اتمدينا علي رجلينا سوا ياراجل يوم ما ظبطونا في المدرسة واحنا طالعين علي شجرة النبق‏..‏ وفاكر ساندوتشات الفول يا أستاذ ولا نسيتها؟ طيب مين اللي علمك سواقة العجل؟‏!‏ بأه ياسيدي أنا شفت لك صورة من كام يوم منشورة في الأهرام عليا النعمة كأنك لسه قاعد جنبي في التختة في سنة أولي تالت ولا كأن أربعين سنة عدوا ياجدع‏..‏

قعدت أبص لك وأضحك‏..‏ أضحك‏..‏ افتكرت يوم ما اديتك علي قفاك وجريت وانت قعدت تعيط في الحوش‏,‏ أوعي تكون لسة شايل مني يابوحجاج‏!!‏ وافتكرت كمان لما قفلت عليك الحمام بتاع المدرسة من برة وانت قعدت تخبط وتصوت ومحدش كان سامعك‏..‏ كانت أيام حلوة يا أخي‏!!‏ وعلي فكرة المقلمة اللي ضاعت منك وقلبت الدنيا عليها وأبوك رنك علقة سخنة علشان ضيعتها‏..‏

بصراحة أنا اللي أخذتها منك‏..‏ أصلها كانت جديدة كده وعاجباني‏..‏ وفضلت لحد ما خلصنا ابتدائي ضميري بيعذبني وعاوز اعترف لك انما خفت أحسن تجرسني في المدرسة كلها‏..‏ يااااه‏..‏ يا يوسف‏..‏ الواحد لو فتح في الكلام عن الأيام دي مش ح يخلص‏..‏ عموما أنا عارف وقتك يا أستاذ‏..‏ مش ح أطول عليك‏..‏ أنا ياسيدي مش عاوز منك أي حاجة أنا بس حبيت أقولك اني فرحان بيك‏..‏ وأنا دلوقت عندي ثلاثة عيال‏..‏ فتح الله‏..‏ وده ياسيدي اتخرج في الجامعة السنة دي وقاعد في ارابيزي ومش لاقينله شغل وأنا قلت له ياد يافتح الله مش ح يشغلك غير عمك يوسف‏..‏ الوسطانية بأه عفاف‏..‏ دي صوتها حلو قوي‏..‏ أحلي من شرين آه يالليل‏..‏ ياريت لو بس تقعدها مع واحد ملحن ولا منتج زي محروس ده يمكن يعمل لها شريط ولا حاجة ما أنا عارف كلهم حبايبك‏..‏ الواد الصغير بأه مرسي‏..‏ عنده‏15‏ سنة ومش فالح في الدراسة انما تشوفه وهو بيلعب كورة في الشارع يابوحجاج تتخض‏..‏ ماردونا قدامك بيلعب‏..‏ وأنا كنت شفت لك صورة قاعد مع زيدان اللي بيلعب في ألمانيا ده وشايفك محتضنة قوي ما تخليه يشوف الواد مرسي يابوحجاج يمكن ياخده معاه ألمانيا ولا حاجة‏..‏ أنا عموما كاتب لك الجواب ده محبة والله العظيم ولا عاوز منك أي حاجة غير اني اسمع عنك كل خير‏..‏

هوه بس فيه طلب كده‏..‏ المدام عندي أصلها موظفة في وزارة المالية‏..‏ لو عندك حد ينقلها لنا تشتغل في الضرائب ح يبأي جميل عمري ما حاانساهولك‏..‏ وأنا باعتلك صورة من أوراقها والدرجة الوظيفية اللي هي فيها‏..‏ أما بالنسبة لي أنا ياحبيبي عمري‏..‏ أنا مش عاوز أي حاجة أنا طلعت معاش مبكر وسويت معاشي وفتحت قهوة صغيرة كده علي قدي ومستورة والحمد لله بس بتوع الحي مطلعين عيني يا أستاذ‏..‏ لو تليفون صغير منك للحي أو للمحافظة‏..‏ ح تخلص‏..‏ أنا عارف‏..‏ ماكلهم حبايبك‏..‏ وأنا عارف أن انا ليا معزة خاصة عندك وأنا فوزي بتاع زمان‏..‏ والنعمة الشريفة فرحان لك ياخويا يا يوسف كده لوجه الله ولا عاوز من وراك أي مصلحة‏..‏ بالمناسبة ـ وأنا معدي في شارع الهرم لقيت اسمك علي مسرحية لعادل امام‏..‏ بتاعتك دي يابوحجاج؟‏!‏ طيب لو بتاعتك عاوزين بون بتسع أفراد عشان محاسن اخت المدام وجوزها وعيالها‏..‏ عاوزين نتبسط ونتفرج وندعيلك‏..‏ سيبك يابوحجاج‏..‏ كل حاجة في الدنيا دي فانية‏..‏ المحبة اللي بجد‏..‏ هي اللي بتدوم‏..‏
أخوك فوزي بتاع زمان
وعشان تفتكرني‏..‏ أولي تالت‏..‏ مدرسة أم المؤمنين الابتدائية المشتركة

واه يا كوفى من آخر المشوار

كتب : يوسف معاطي

واه يا كوفى من آخر المشوار

كنت كثيرا ما أشعر بسعادة غامرة لأنني خلقت انسانا‏..‏ أفكر وأحلم وأغني وأكتب واقرأ‏..‏ فلو كنت لا سمح الله حمارا‏,‏ بالتأكيد لم أكن سأشعر بهذا الزهو الآدمي‏..‏ والناس كانوا سيركبونني ويرفسونني بأرجلهم‏..‏ الحمد لله انني لست منتميا الي دولة الحمير‏..‏ التي ينعتونها بالغباء وبأنها أنكر الأصوات ولا تجد لها نصيرا ولا مدافعا‏..‏ أما أنا‏..‏ فهيئات كثيرة محترمة تهتم بي‏..‏ وتدافع عني‏..‏ خذ عندك من أول‏..‏ هيئة الأمم المنتحرة‏..‏ الي مجلس القمل‏..‏ الي منظمة حروق الإنسان‏..‏ وكنت كلما شاهدت علي الشاشة‏..‏ أخونا الفاضل كوفي عنان‏..‏ شدني إليه بسماره الذي يشبه سماري وبشعره الأبيض الذي يشبه شعري وعيونه السود التي تشبه عيوني‏,‏ كنت أحس دائما أن هذا الرجل ح يطلع في الآخر يا خالي يا جوز خالتي ولابد وأنه يحمل همومي فوق كتفيه‏..‏

وكنت أشعر بمتعة وأنا أنطق اسمه‏..‏ أصل اسمه حلو بصراحة‏..‏ كوفي؟‏!..‏ وعنان كمان؟‏!..‏ يا سلام‏..‏ يامحاسن الصدف‏..‏ الي أن افقت علي الحقيقة المرة وهي أن كوفي عنان ليس خالي أنا ولا عمي أنا‏..‏ وانما طلع خال كوندوليزا رايس وجوز خالة كولين باول‏..‏ والعيلة دي كلها شغالين في البيت الأبيض أبا عن جد‏..‏ كسفرجية‏.‏ وأونكل كوفي‏..‏ حينما استلم الوظيفة في الأمم المتحدة كان يعلم جيدا أنه رجل وظيفته أن يوقع علي أوراق ليس له أي رأي فيها‏..‏ وانها وظيفة طبق الأصل من وظيفة محجوب عبدالدايم في فيلم القاهرة‏30..‏ وياقوت افندي في مسرحية السكرتير الفني‏..‏ وكان أونكل كوفي يعلم أيضا‏..‏ أن اللي ما يعملهمش وهو في الخدمة لايمكن يعملهم أبدا‏..‏ واثناء الحصار علي العراق‏..‏ وبرنامج النفط مقابل الغذاء‏..‏ وجد كوفي لقمة عيش حلوة لابنه في هذه اليغمة‏..‏ وروح يابني كل عيش‏..‏ هيه جات عليك انت‏..‏ وكوفي عنان يقبض راتبا كبيرا بالدولار من الأمم المتحدة‏..‏ تدفعه له الدول الأعضاء في هيئة الأمم المتحدة‏..‏ والدولة تدفع لكوفي عنان‏..‏ من أموال الشعب طبعا‏.‏

وبما انني إنسان كما قلت في بداية المقال‏..‏ ولست حمارا‏..‏ فيخصم مني ضرائب ومن ضرائبي هذه يدفعون لكوفي أنان‏..‏ ربما تصل حصتي التي أدفعها أنا فقط الي حوالي جنيه وربع‏..‏ معلش‏..‏ أنا عاوزهم ياجماعة‏..‏ مفيهاش احراج أصل الحاجات دي ماتزعلش ياكوفي ياخويا‏..‏ مادامت قرارات الأمم المتحدة ومجلس الأمن كلها في الكلتشة وفنجرة بق‏..‏ احنا أولي بالفلوس دي مش ح تبأوا انتوا والحكومة‏..‏ ولقد كنت غبيا طول حياتي حينما تصورت انني انسان ولست حمارا‏..‏ مادام الكل يركبونني‏..‏ ويرفسونني بأرجلهم ويعتقدون انني أغبي المخلوقات‏..‏

ومادام ان صوتنا في الأمم المتحدة هو أنكر الأصوات‏..‏ مادمتم لا تسمعون سوي صوت الفيتو‏..‏ وانا بصراحة ياكوفي بأيت باتشاءم منكوا واول مااشوف عربية من بتوعكوا مكتوب عليها‏UN‏ في أي حتة أقول خلاص ح تولع‏..‏ اذا كنتوا قبلتوا الضرب علي نفسكوا ياكوفي ومات أربعة منكوا بصاروخ اسرائيلي‏..‏ ومازعلتوش وطلعتوا تدافعون عنها‏..‏ وقلتوا‏..‏ ما تقصدش‏..‏ يا عم ابوس ايدك‏..‏ حل عني‏..‏ وابعت الجنيه وربع‏,‏ ومش عاوز من وشكوا أي حاجة‏..‏ ياعم‏..‏ خلاص‏..‏ اعتبرني فنزويلي‏..‏ ياسيدي انا ايراني‏..‏ أنا كوري‏..‏ ما تخنقنيش ياعم كوفي‏..‏ محبش حد يمسكني وأنا متعصب‏..‏ أمم ايه دي اللي متحدة ياعم؟‏!‏ متحدة علينا‏!!‏ ما أنا مش عاوز أغلط بأه في الكلام‏..‏ هات يابا الاثنين جنيه اللي عليك وغلطة ثانية واديلك خمسة وسبعين قرش‏..