سمي .. وكل

سمي .. وكل

اعترض الناس وثاروا لأنّ دقيق العيش ـ الخبز ـ مخلوط بعلف الحيوانات !! وهو اعتراض طبقي
لا يخلو من نزعة آدميّة نرجسيّة تلك ( الألاطة ) الإنسانيّة التي تصوّر للإنسان أنّه أفضل من الحيوان ..
وهاجت الصحافة وانطلقت الأقلام في دفاع مستميت عن حقّ المواطن في أن يأكل خبزاً خالياً
من العلف .. بينما لم يسجّل قلم كلمة اعتراض واحدة عن رفض الحيوانات أن تأكل علفاً مخلوطاً
بالخبز الآدمي !! وقد قال لي أحد المدافعين عن الصفقة .. وإيه يعني .. هو العلف ده مش بتاكله
البهايم ؟! قلت له مظبوط .. فعاد وقال لي .. واحنا مش بعد كده بناكل البهايم دي ؟! قلت مظبوط ..
فقال .. إيه بأه اللي مزعّلنا ؟! وبعدين هو العلف وحش ؟! يا ريت
يا أخي يعلفونا .. ده الجيل كلّه طالع هفتان وممقوت .. خللي ـ اترك ـ العيال تاكل وترعرع كده ..
وهو البرسيم يعني يفرق إيه عن الجرجير والجعضيض والفجل أهي كلّها ( خوضرة ) إنّما احنا
يعني عشان شفنا البهايم بتاكل برسيم عملنا فيها بأه ـ تصنّعنا ـ بني آدمين ( إنفين ) وما ناكلش
من اللي بتاكله البهايم .. يا راجل أنا قعدت في لندن آكل ( بلوبيف ) سنة كاملة .. وفي الآخر
طلع أكل كلاب .... ـ يقسم ـ يا صاحبي ما دوقت أطعم ولا ألذّ من كده هيّه حتّة نفسيّة ( مسألة
نفسيّة ) والله .. مش مسألة أكل دوقت بذمّتك شوربة الضفادع ؟!
قلت في تقزّز .. يع .. أنا مش ناقص قرف .. ابتسم في سخرية وقال لي مش بقولّك مسألة نفسيّة..
أنا قلت لك الضفادع من هنا .. ومخّك راح للترعة في البلد .. والطين .. والمستنقعات .. إنّما الضفدعة
لمّا تلاقيها في الطبق قدّامك عاملة زيّ الاستاكوزة وطِعمة بشكل!! وجنبها طماطماية متقطّعة
على شكل نجمة .. وجنبها شويّة ( ألابندا ) كده تخلّي ريقك يجري مش ح تقول كده رغيف العلف ،
اللي مش عاجبك ده دخل فرن مظبوط .. وحطّ عليه شويّة سمسم .. و( سنّة فانيليا ) ..
وكل وادعيلي .. أصلك ح تقعد تفتّش في كلّ حاجة مش ح تاكل .. حتّة لحمة محطوطة ـ موضوعة ـ
قدّامك في الطبق .. حدّ عارف دي جايه منين .. سمّي وكل .. أنا مش ح أجيبلك شهادة منشأ
بأه .. وتاريخ حياة حتّة اللحمة عشان تاكل .. ما هم ظبطوا تسع رؤوس لحمير مرميّة ـ ملقاة ـ
في مقلب زبالة .. حدّ عارف الجتت ـ الأجسام ـ راحت فين .. قالوا الأسود أكلوها .. والأسود اعترفت
والموضوع خلص .. ما سألتش نفسك كده .. مش يمكن الأسود دي اعترفت تحت ضغط .. آه ..
همّا عشان أسود فاكرينهم ـ معتقدهم ـ يقدروا يحجّروا مع الحكومة !! ده .. فيه أسد قعد يزأر ويقول
لأه ـ لا ـ أنا ما كلتش لحمة حمير .. اللبؤه بتاعته ادّيتله ـ أعطته ـ زغدة بعيد عنّك .. وقالت له اسكت
يابن ال... خلّينا عايشين في القفص كده جنب الحيط انت فاكر نفسك في الغابة .. هيه مسألة نفسيّة ..
انت مثلاً فكّرت تأكل حشرات ؟! اعملّي فيها قرفان بأه وهترجّع ـ تتقيّأ ـ .. انت عارف إنّ الحشرات دي
من أنظف المخلوقات ؟ أيوه زيّ ما بقولّك ..ما بتتغذاش 1% على النباتات ولعلمك حتّى الحشرات
المفترسة أنضف من الفراخ اللي انت فرحان قوي وانت بتاكلها دي .. والحشرات دي بأه من أهمّ
الأصناف اللي بياكلوها في ( ساندوتشات ) نمل بالزبدة .. حكاية .. واللا حرامي الحلّة مشوي ..
الله .. نحل أحمر وروح اتفرّج في السوق هناك تلاقي طوابير بالضرب .. وتلقى بأه الناس عمّالة
تفاصل ـ تجادل البائع في الثمن ـ والبيّاعين عاملين أكياس مليانة نمل أحمر .. يأخذ الزبون الكيس من هنا
وينزل أكل في النمل وهو حيّ وكلّه فيتامينات .. واللا النمل الأبيض في أفريقيا .. النملاية
تلاقيها قدّ الحمّصاية وطعمه زيّ اللبن المركّز .. بس وانت بتاكل له طريقة .. لأنّ النملاية لو اتزحلقت ـ سقطت ـ
من بقّك ـ فمك ـ وانت بتاكلها بتقرص جامد .. وفي المكسيك يعصروا النمل ده ويقدّموه في الأفراح زيّ الشربات ..
ده أنا حضرت فرح مكسيكي شربت فيه نمل لمّا اتعميت .. في أمريكا الجنوبيّة بأه يموّتوا الجراد
.. يتشوي ويتملّح .. ابعت لك برطمان أحلى مَزّة تاكلها في حياتك .. ولعلمك بأه ..
من مئات السنين والبشر بياكلوا الحشرات .. والأطبّاء سمحوا بيها عملاً بمبدأ ( الضرورات تبيح المحظورات )
وبعديم ما انت بتاكل تعابين ـ ثعابين ـ السمك وتقول عليها ( قراميط ) .. إنّها راحت واللا جت هيّ تعابين ..
الخنافس بأه .. هنا لم أستطع أن أصبر .. قلت له أرجوك .. أغلق هذا الموضوع .. انا آسف سآكل عيش مخلوط
بالعلف خلاص يا سيدي أنا لا أعترض .. هنا ابتسم في راحة وقال .. أنا بس جيت أقولّك عشان ما تخدش ـ لكي
لا تأخذ ـ الموضوع على أعصابكثمّ أشار للجرسون وقال .. اتنين تبن وواحد برسيم لو سمحت .. ثمّ عاد لي
وقال .. سمّي وكل يا أبو حجّاج ـ كنية ـ خير ربّنا كتير مش أحسن ما ناكل بعض !!